حكايات مش بتتحكي !!

عندي هواية إلى حد ما غريبة , بمارسها كل ما أركب ميكروباص أو أتوبيس أو أروح حتة فيها ناس كتير , هوايتي اني بحب أبص في وشوش الناس , لأ مش وشوشهم .. في عيونهم تحديداً , مش عارف ليه بتستهويني الحكاية دي وبلاقي فيها متعتي الخاصة , يمكن علشان بسمع كلام كتير يتقال من خلالهم من غير ما شفايفهم تتحرك , مبكونش عارف هي الحكايات والأسرار اللي بسمعها بعيني دي هما اللي بيقولوهالي بمزاجهم ولا هما بيكونوا قافلين عليها وشباك عينيهم هو اللي بيفضحهم كل ما يتفتح , ولا هي بتكون عبارة عن شفرة أو (كود) وكأنهم بيقولولي :" أيوة دي أسرارنا لو عرفت تقراها يبقى من حقك تعرفها" !!

مبتهمنيش اوي النقطة اللي فاتت دي وبصراحة مبفكرش فيها كتير لأنني مش مستعد أغير هوايتي دي – حاليا على الأقل – وأبطل أبص في عيونهم أو حتى أستئذنهم قبل ما أعمل كده ..

ركبت الميكروباص وأبص لواحد عجوز , مع أول نظرة تحس بالشقى والتعب والبهدلة طول السنين اللي فاتت , يغمض عينيه ويفتحها وتلاقي نظرة أمل بتعرفها لما تلاقيه بيبص لبعيد مع ابتسامة صغيرة , وتعرف انه بيفكر في أولاده وأحفاده وكل حاجة حلوة سايبها في الدنيا , يرمش ويفتّح تاني تلاقيه باصص لفوق و كأنه بيقول :"يا رب أنا خلاص جايّلك أهو , يا ترى انت راضي عني ولا لأ !!" , ينهيها بتمتمة محدش سمعها , فجأة يغمض عينه ويفتحها ألاقيه بيبصلي .. أضطر اني أوجِّه نظري في حتة تانية بسرعة لحد ما يبعد بصره عني و أرجع أبصله تاني .. لقيت نظرة قلق على البلد واللي بيحصل فيها – حسيت بكده لما لقيته باصص على الطريق – وعلى جو (الأكشن) المبالغ فيه ده واللي مكنوش يتوقعوا انهم يشوفوا نصه من أول ما الحرب خلصت , يرمش تاني وألاقي بصِّة زهق من كتر التفكير من كتر اللي شافه من كتر اللي كان عايز يقوله ومقالهوش .. من كتر الحياة يمكن كمان ! ... مرة تانية ألاقيه باصصلي ومستغرب , هنا أنا مضطر أبعد عنه عيني تماماً ومش هقدر للأسف أكمل معاه الحكاية , تعرف هي دي المشكلة في الهواية بتاعتي .. لا يمكن حد هيفهم نظرتي صح أبداً , ممكن الراجل يفتكرني بحتقره أو مستغرب من شكله وممكن كمان يفتكرني بخطط اني أسرقه – اه والله – ولو كانت واحدة ست ممكن تكون فاكراني قليل الأدب أو بعاكسها او بفكر أسرق شنطتها برضه , متعرفش هو العيب فيّ اني في سن كل البلطجية – اللي هما شباب زي الورد – ولا العيب فيهم علشان هما اللي تفكيرهم على قدهم , بس بيني وبينك معذورين برضه يا جدع , هو فيه حد يصدق انك بتبص على وشوش الناس علشان تشوف عيونهم بتقول ايه !! ده ممكن يصدقوا أي حاجة من اللي فاتوا دول وميصدقوش الهبل ده , مش مشكلة , نرجع تاني لنفس الميكروباص .. ركبت ست في الأربعينيات من عمرها كده من النوع (mask face) , النوع ده مش النوع المفضل لي خالص – بالنسبة لهوايتي طبعاً – لأنك على ما تاخد منه حدوتة أو حتى مشهد من حياته هيكون حصلت مشكلة بالذات لو واحدة ست علشان أكيد هتتفهم غلط رغم انها في سن والدتي , أسيبها وأبص ناحية تانية ألاقي بنتين في سن الثانوي قاعدين جنب بعض ومعاهم نفس المذكرات – واضح انهم رايحين درس – وبالرغم من ان البنتين بيتكلموا كأنهم اصحاب لكن نظراتهم بتقول غير كده خالص , البنت الأولى واضح كده انها عندها لا مبالاة , شخصية سطحية جداً ,واخدة الحياة ببساطة أكتر من اللازم , وعايشاها كده وخلاص , تقريبا كمان ماشية مع (صاحبتها) دي علشان هي دي اللي لقتها قدامها مش أكتر !!

البنت التانية رغم انها (أقل منها جمالاً) لكن واضح انها ((مش سهلة)) زي ما بيقولوا , عارفة هي عايزة ايه كويس وبتعمل اللي هي عايزاه ,وعارفة كتير بس بتتكلم قليل , وبين كل عشر نظرات حب ومودة بتديها لـ(صاحبتها) فيه نظرة كُره أو حقد أو احتقار – مقدرتش أحدد النظرة بالضبط علشان مظلمهاش لكنها كانت نظرة سلبية وخلاص - بتوجههالها كل ما تبص بوشها الناحية التانية , يمكن شفقة عليها انها مش بالحماس بتاعها في الحياة ويمكن حقد علشان هي أجمل منها شوية , اتضح بعد اقل من دقيقتين من النظرات انهم مش صحاب بالمعنى الحقيقي للكلمة , مجرد زمايل جمعهم درس ما لفترة معينة وكل واحد هيروح لحاله  , و اضطريت برضه أبعد نظري عنهم علشان متفهمشي غلط !

لقيت ان الناس بتبصلي بنظرات مش مريحة وواضح انهم بدؤوا يتضايقوا مني فاضطريت اني ابص من الشباك في اللي اتبقالي من الطريق , رغم انها مش هوايتي المفضلة لكنها برضه بتمثلي نوع من الاسترخاء والسعادة .. ببص للطريق والمحلات و العربيات , تعرف ساعات ببص على بيت قديم واحس انه بيقوللي حاجة ساعات بحس انه بيعيط او متضايق ان محدش سامعه , ساعات ببص على محل جديد وأحس انه بيبتسم وكأنه فرحان بشبابه أو لأنه يمكن لسه ميعرفش اللي فيها !

  تحس في الآخر ان كل واحد , كل بيت , كل شارع له حكايته الخاصة , حكايته اللي ميعرفهاش غيره حكايته اللي بيفخر انها حكاية مش بتتحكي !!